არქიტექტურული დიზაინი | 18 მარტი - 22 აპრილი

10-შეხვედრიანი საინფორმაციო-გაცნობითი კურსი განკუთვნილია მათთვის, ვინც დაინტერესებულია არქიტექტურით და სურს, გაერკვეს, რას წარმოადგენს ეს პროფესია. კურსი საინტერესო იქნება მოზარდებისთვის და იმ ადამიანებისთვის, რომლებიც არქიტექტურის მიმართულებით განათლების მიღებას ან კარიერის დაწყებას განიხილავენ, თუმცა ამ სფეროსთან შეხება ჯერ არ ჰქონიათ.

მოკლე კურსი წარმოადგენს არა აკადემიურ არქიტექტურულ სწავლებას, არამედ გაცნობით პროგრამას, რომელიც მონაწილეებს არქიტექტურის ზოგადი პრინციპების, სივრცითი აზროვნებისა და მისი თანამედროვე როლის უკეთ გაგებაში დაეხმარება. კურსი მოიცავს თეორიულ და პრაქტიკულ კომპონენტებს - ვორქშოპებს არქიტექტურულ სკეჩში, მოდელირებაში, მცირე ზომის სივრცის პროექტირებაში და ა.შ.

შეხვედრები შეეხება ტრადიციული და თანამედროვე არქიტექტურული სტილისტიკის ძირითად ასპექტებს, ურბანისტულ საკითხებსა და კონცეფციებს, პროექტირების საბაზისო პრინციპებსა და იმ კავშირებს, რომლებიც ყოფიერებასა და არქიტექტურას შორის არსებობს. მონაწილეები იმსჯელებენ სხვადასხვა სივრცის მნიშვნელობაზე, მიიღებენ ვიზუალურ ინფორმაციას მსოფლიო არქიტექტურის შესახებ, შეეხებიან პროექტირების რთულ და საინტერესო პროცესს, რის შედეგადაც შეიძენენ კომპლექსური აზროვნების უნარებს, რომლებიც აუცილებელია არამხოლოდ არქიტექტურისთვის არამედ ბევრი სხვა პროფესიისთვისაც.